انا بتعامل معاه كاصدقاء لكن هو بيعاملنى كحبيبه ومش عارفة اعمل ايه..

بسم الله الرحمن الرحيم
انا بنوته عندى 21 سنه عندى مشكله واتمنى تساعدينى فيها انا اتعرفت على شخص عنده 25 سنه من خلال التليفون رقمه نفس رقمى فطبعا فى الاول صديته لان عارفه انه مش ينفع بعد شويه بدا يقرب كنت خارجه من تجربه حب فاشله وقاسيه جدا خلتنى فاقده الثقه فى كل اللى حواليا فلاقيت الشخص ده يوم بعد يوم بيقربلى جدا ويهتم بيا وامتحاناتى وبدات احس انه جمبى فعلا بدات ارفض الوضع ده يوم بعد يوم بقى وجوده شبه اساسى فى حياتى حد فرض نفسه على حياتى فى وقت كنت فيه لوحدى جدا وش فى اى حد جمبى بعد شويه طلب منى انى اكلم اهلى لانه عاوز يتقدملى فانا رفضت وبعدت وهو مدانيش فرصه انى ابعد فضل متمسك بيا كل ماابعد عنه الاقيه بعد كام يوم يتصل ويقولى مش قادر مع العلم انا مصرحتلوش باى مشاعر تجاهه حد لو كانت مجرد ارتياح انا بتعامل كاصدقاء لكن هو بيعاملنى كحبيبه انا عندى مشكلتين اولا لانه هو من الاقصر وانا من الغربيه يعنى عادات وتقاليد مختلفه مش هيبقى عندى فرصه اتعرف عليه اكتر لان طبعا زياراته هتبقى محدوده جدا تانى حاجه انا مش عارفه اقول لاهلى ايه عرفته ازاى حاسه الموقف مش لذيذ اتمنى مساعدك واسفه للاطاله وجزاكى الله خيرا

السلام عليكم ورحمة الله وبركاته بصى يا قمر مشكلتك عايزة توضيح اكتر من كده بمعنى ان فى حاجات لازم تقوليها لى علشان اقدر اساعدك اكتر زى **اولا انتو عرفتو بعض من اد ايه وكمان هل حصل واتقابلتوا ولو مرة اوحتى شوفتو صور بعض كمان انتى عارفة ايه عنه وعن حياته يعنى هل هو مستواه المادى والعائلى والتعليمى مناسب ليكى ولا لاءه و كمان لازم كنتى تقولى لى مشاعرك ايه ناحيته وهل انتى بتحبيه بجد ولا عايزة تخديه كمسكن بعد التجربه المؤلمة الاولى ..وعلشان كده ياريت تبعتى لى مرة تانية توضحى لى الصورة اكتر علشان اقدر اساعدك بجد ولكن انا هحاول الرد على مشكلتك فى حدود الكلام اللى انت قولتيه لي اول حاجة انا عارفة اد ايه الصدمة العاطفية اللى مريتى بيها مؤلمة واللى يجعلها اصعب واصعب انك متلاقيش حد تفضفضى معاه و يقف معاكى علشان كده انتى دخلتى فى علاقة مع شخص ماتعرفهوش لمجرد انك تحاولى تنسى تجربتك المؤلمة وواضح انه نجح انه ينسيكى الشخص الاول وبدأ يحتل مكانه فى قلبك لكن واضح انك خايفة جدا من تكرار الصدمة وعلشان كده انت عمرك ما قولتى له انك بتحبيه رغم ان انا متأكدةانه قالك انه بيحبك بدل المرة عشرة تانى حاجة شئ كويس جداا انه يعرض عليكى انه يتقدم لأهلك بس المهم انه يكون بيتكلم بجد ومتكنش ديه حيلة بيستخدها زى بعض الشباب اللى بيعرضوا على البنات الجواز ككلام بس لانه يعرفها كويس وعارف ان الظروف مش مناسبة يعنى هو عارف ان البنت هتقوله لاءه نأجل موضوع انك تتقدم لاهلى شويه وعلشان كده انا شايفة انك لو حاسة ان فى مشاعر منك ليه ومرتاحة له وافقى انه يجى يتقدم ليكى وبكده تتأكدى انه مش بيتسلى وانه بجد بيحبك وساعتها هتتحل المشكلة الاولى عندك وهى انكم تتعرفوا على بعض عن قرب وده هيكون عن طريق الزيارات عندكم فى البيت وممكن بما انه هيبقى خطيبك تكلميه على النت لان بلدكم بعيدة عن بعض وهيبقى صعب انكم تتقابلوا كتير وبالنسبة لاهلك هتقولى لهم عرفتيه ازاى فديه محلولة يعنى ممكن لو هو عنده اخت تقولى لهم فى البيت انك ليكى واحدة صحبتك عرفتك على بنت صحبتها من الاقصر وانكم بقيته اصحاب وبعدها بشوية تقولى لهم ان صحبتك بتاعت الاقصر ليها اخ وعايز يتقدم لكى وبكده تبقى مفيش مشكلة عندك فى البيت

سوما اللبيدى